Atvinnumálin hafa forgang fram yfir annað

 

Mikið hefur verið rætt síðustu vikurnar um hvað úrskeiðis hafi farið. Við hundeltum sökudólga og menn eru þegar komnir í þungar heimspekilegar og hagfræðilegar vangaveltur um hvað hafi valdið hinu efnahagslega hruni.                      

Gjaldeyrismál, gengisþróun, upptaka evru og þar fram eftir götunum eru allt mál sem þarf að gaumgæfa.  Það er gott og vel en forgangsröðunin þyrfti kannski að vera önnur.                                      

 

Atvinnan er að mínu viti aðalatriðið. Það þarf fyrst og fremst að huga að hag hins vinnandi manns og fjölskyldna, atvinnuöryggi og fjárhagslegri afkomu. 

 

Atvinnumissir er harmleikur.  Að missa vinnuna hefur ekki aðeins slæm áhrif á efnahaginn heldur líka djúpstæð áhrif á sálarlífið og á alla þá sem í kringum þann sem missir vinnuna. Atvinnumissir er fjölskylduharmleikur. 

 

Atvinnumissir er eins og ástvinamissir og að missa heilsuna áfall sem kemur  alltaf á óvart, eitt þyngsta högg sem menn geta orðið fyrir á lífsleiðinni.

 

Við atvinnumissi er hætta á að fjölskyldur flosni upp, til hjónaskilnaða komi og áhrifa gæti á börnin.  Afneitun, reiði og sorg fylgir í kjölfarið líkt og við önnur alvarleg áföll í lífinu. 

 

Við Íslendingar höfum verið svo lánsamir að búa við meira og betra atvinnuöryggi en flestar þjóðir í Vestur-Evrópu.  Hér á landi hefur atvinnuleysi verið lítið í gegnum árin.  Við þekkjum því sem betur fer ekki hörmungar atvinnuleysisins.                                          

Það er því eitt brýnasta verkefnið sem við stöndum frammi fyrir núna að reyna að auka atvinnutækifærin og að halda hjólum atvinnulífsins gangandi.  Fari þau í enn frekari hægagang er sannarlega veruleg vá fyrir dyrum. 

 

Einbeitum okkur að atvinnunni frekar en að horfa alltof mikið í baksýnisspegilinn og vangaveltum um hvort eigi að setja krónuna á flot eða hefta gjaldeyrisviðskipti o.s.frv.  Auðvitað hangir þetta allt saman en atvinnan hefur  forgang fram yfir annað. 

Frumvarpið vottur um uppgjöf

Athugasemdir

[Haraldur Haraldsson, 28.11.2008 kl. 23:08]

Sammála þessu ,en einnig er það að taka verðtrygginguna af meðan þetta varir þessi ósköp/Halli gamli

[Jón Halldór Guðmundsson, 29.11.2008 kl. 00:05]

Frábært blogg Guðjón.  Ég tek einnig undir með Haraldi eðalkrata, sem vill gera það sem hægt er til að almenningur missi ekki eigur sínar í krónufárinu.