Mr. Skallagrimsson, snilldar einleikur í Borgarnesi

Í gærkvöldi fór ég á einhverja skemmtilegustu leiksýningu og um margt sérkennilegustu sem ég hef séð lengi.  Þetta var  einleikurinn Mr. Skallagrímsson sem er eftir leikarann Benedikt Erlingsson.  Benedikt rekur ævi Egils Skallagrímssonar í 120 mínútna einleik og fer algjörlega á kostum.  Ekki skal mig undra þótt Benedikt hafi fengið þrjár Grímur fyrir þetta leikverk:  besti handritshöfundur, besti leikari og besta leikstjórn.  Sýningin er í Landnámssetri Íslands í Borgarnesi og er öll umgjörðin um leiksýninguna hin skemmtilegasta og fróðlegasta.  Á sama tíma og fólk veltist um af hlátri verður nálægð Egils ekki umflúin. Sem sagt bæði fræðandi en aðallega bara  snilldarvel gert og þrælskemmtilegt. 

Lögmál Murphy´s

 

1. Ef eitthvað getur farið úrskeiðis þá fer það úrskeið
2. Það er aldrei neitt eins einfalt og það virðist í fyrstu
3. Það sem þú ákveður að gera kostar alltaf meiri peninga en  þú áætlaðir
4. Allt tekur lengri tíma en þú býst við
5. Ef þú fiktar nógu lengi við eitthvað þá mun það að lokum eyðileggjast
6. Ef þú reynir að gera öllum til hæfis, þá mun einhverjum ekki líka það
7. Það er náttúrulögmál að ekkert heppnast fullkomlega
8. Ef þú vilt gera eitthvað, þá verður þú alltaf að gera eitthvað áður
9. Auðveldarar er í að komast en úr að losna
10. Ef þú útskýrir eitthvað svo vel að ekki sé hægt að misskilja það, þá mun samt einhver gera það.
11. Ef hlutirnir virðast ætla að ganga betur, þá hefur þú gleymt einhverju
12. Ekkert er ómögulegt fyrir þann sem ekki þarf að gera það sjálfur
13. Þegar einu sinni er búið að klúðra verki þá gerir hvað sem gert er til að bæta það bara illt verra. 
14. Það er ekkert til sem heitir ókeypis matur.

Regla O´Tooles: Murphy var bjartsýnismaður. 

Holdgervingar hrokans, myndbandið góða

Ekki veitir af að minna okkur á hrokann.  Það er ágætt að hafa snilldarvel unnið myndband Láru Hönnu Einarsdóttur sem er hér á síðunni rétt til áminningar fyrir mótmælafundinn í dag. 

Eru þetta bankastjórar Seðlabankans?

Fann þessa ágætu mynd af bankastjórum Seðlabankans í safni mínu nýlega.  Myndin er tekin fyrir nokkuð löngu.  Ég er alls ekki viss um hver þeirra er formaður stjórnar enda þekki ég hina tvo ekki í sjón, held reyndar að þeir hafi eiginlega lítið sést og fáir viti hverjir þeir eru eða hvað þeir eru að gera.  En ég veit að einn hinna þriggja hefur verið hárprúður. 

Myndband af mótmælafundi

Í dag kl. 15 verður mótmælafundur í miðborg Reykjavíkur.  Fólk hvatt til þess að mæta og sýna samstöðu með málefni dagsins eða málefni því sem skekið hefur íslensku þjóðina meira en nokkuð annað síðustu áratuginu.  Sýni hér með hjálp youtube myndir frá mótmælum niðri á Austurvelli.  Vonandi verður mannfjöldinn meiri og styrkurinn það mikill að seðlabankastjórinn fari nú að standa upp úr stólnum.  Er ekki mál að linni?  Myndbandið af honum er annars hérna fyrir neðan á síðunni. 

Er bakari hengdur fyrir smið?

Um það bil fjórðungur íslensku þjóðarinnar hefur skrifað nafn sitt á listann indefence.is , ávarp til Breta um að Íslendingar séu ekki hryðjuverkamenn.  Þessi undirskriftasöfnun sýnir samstöðu þjóðarinnar.  Hér er hins vegar listinn yfir mannskapinn sem sigldi þjóðarskútunni í kaf meðan Seðlabankinn og Stjórnarráðið svaf. Eru Bretar að hengja bakara fyrir smið? 

1.    Björgólfur Thor Björgólfsson   2.    Björgólfur Guðmundsson    3.    Magnús Þorsteinsson 4.    Ágúst Guðmundsson    5.    Lýður Guðmundsson   6.    Sigurður Einarsson   7.    Hreiðar Már Sigurðsson   8.    Jón Ásgeir Jóhannesson   9.    Kristín Jóhannesdóttir  10.  Ingibjörg Pálmadóttir  11.  Gunnar Smári Egilsson   12.  Gunnar Sigurðsson  13.  Pálmi Haraldsson   14.  Jóhannes Kristinsson  15.  Magnús Ármann  16.  Þorsteinn M. Jónsson  17.  Kári Stefánsson       18.  Hannes Smárason   19.  Kristinn Björnsson  20.  Magnús Kristinsson   21.  Bjarni Ármannsson      22.  Róbert Wessmann 23.  Ólafur Ólafsson 24.  Karl Wernersson  25.  Þorsteinn Már Baldvinsson   26.  Sigurjón Árnason    27.  Halldór Kristjánsson     

   Einhverja vantar á listann.                                                                                                                      

Útrásarsöngur Davíðs Oddssonar

Það hefur komið fram í blogfærslum nokkrum að formaður bankastjórnar  Seðlabankans hafi varað við útrásinni svonefndu  og hann hefur haldið því fram að hann hafi aldrei hampað útrásarmönnum.

Í þessari snilldarlegu samsetningu Láru Hönnu Einarsdóttur sem er að finna á blogsíðu hennar, larahanna.blog.is, er að finna þessa skemmtilegu samsetningu úr sjónvarpsupptökum og viðtölum og hefur myndbandið verið sett inn á youtube.com.    Myndirnar tala auðvitað sínu máli.  Ég vona að Lára Hanna misvirði ekki við mig þessa ábendingu en samsetningin er svo skemmtileg og sannfærandi að það er ekki hægt annað en að leyfa fleirum að njóta hennar.

Laun bankastjóra Nýja Landsbankans og áhættuútlánin

Í einum prentmiðlinum í dag kemur fram að Elín Sigfúsdóttir, núverandi bankastjóri sé hæst launaði bankastjórinn, með 1.950.000 á mánuði en auk þess fallegan dýran jeppa til að aka á.  Þetta væri í sjálfu sér allt í fína lagi ef bankastjórinn nýji hefði vammlausa fortíð.  Var hún  ekki áður yfirmaður yfir lánadeild fyrirtækjasviðs gamla Landsbankans?  Var það ekki hún sem skrifaði undir öll lánin til ýmissa áhættusamra verkefna og gæluverkefn á Íslandi?  Er það rétt að þau hafi numið 400 milljörðum króna?  Hvaðan komu þeir peningar, innlánsfé frá IceSafe reikningum í Bretlandi?  Sú fjármálameðferð sem komið hefur þjóðinni í mest vandræði og er þó af nógu að taka.   Eru kannski flestir þeirra aðila sem voru þáttakendur í þessum flutningi á fé frá Englandi og Hollandi til misheppilegra verkefna á Íslandi enn við störf hjá Nýja Landsbankanum?  Erum við gjörsamlega sokkin í fen siðblindunnar?  Auðvitað þarf að skipta alveg um skipstjórn, bæði skipstjóra og yfirmenn og jafnvel háseta á skipi sem hefur strandað vegna klúðurs. 

Minnisblað forsætisráðherra

Virðulegur forsætisráðherra,

  

Íslenska þjóðin er hrædd, reið, í uppnámi og óörugg um framtíð sína og afkomenda okkar. Upplausnarástand ríkir í þjóðfélaginu. Almenningi í landinu er ljóst að fyrirsjáanalegt er langt og erfitt harðæri sem á sér vart hliðstæðu í mjög marga áratugi.  Hér á eftir eru nokkur atriði sem ég veit að þér er kunnugt um að flestu leiti en ég set engu að síður niður á “minnisblað” og tel mig með því vera að tjá skoðun hins almenna þegns í þessu landi:    

  

1. Vaxandi atvinnleysi virðist vera að leiða til landflótta, einkum þeirra sem hafa starfsmenntun eins og iðnaðarmanna og háskólamennts fólks. 
2. Þetta gæti leitt til lægra menntunarstigs þjóðarinnar næstu árin en á móti kemur að fólk fer frekar í nám en vinnu en það skilar ekki menntuðu fólki fyrr en eftir mörg ár.  Við höfum talað um að auðlegð okkar lægi í vel menntuðu fólki, kannski er sú auðlegt í rénun. 
3. Það er vel þekkt að hlutfall öryrkja,  lífeyrisþega og þeirra sem hafa skerta vinnugetu / vinnufæru fólki hækkar að jafnaði þegar skórinn kreppir að.    
4. Ásókn í atvinnuleysisbætur, örorkulífeyri, bætur úr sjúkrasjóðum stéttarfélaga  og hvers kyns annan lífeyri mun aukast en ráðstöfunartekjur minnka og má ekki við því, síst meðal þessara þegna.   
5. Þegar harðnar á dalnum í þjóðfélögum aukast glæpir – þjófnaðir, skjalafals, fíkniefnasmygl, ofbeldi o.s.frv. – að hluta til vegna fjárskorts hins almenna borgara en einnig fjárskorts innan  löggæslunnar. 
6. Áfengistengdum vandamálum fjölgar almennt með auknu atvinnuleysi og upplausnarástandi.
7. Verslun er að dragast saman, fyrirtæki fara í gjaldþrot, framboð á nauðsynjavörum minnkar. 
8. Það dregur úr frístundaiðkun barna s.s. íþróttaiðkun og tónlistariðkun vegna þrengri fjárhags foreldra. 
9. Frjáls félagasamtök, líknarfélög, kórar, hljómsveitir, listamenn almennt hafa úr minnu að moða sem kemur illa niður á starfssemi þeirra sem dregur úr menningu í landinu en hin frjálsu félagasamtök minnka aðstoð sína við þá sem bera skarðan hlut frá borði og auðvitað þá sem síst skyldi.  
10. Það dregur þegar úr ferðalögum Íslendinga til útlanda bæði vegna óhagstæðs gengis sem og ills orðspors Íslendinga almennt á erlendri grundu, en aðallega vegna óöryggis og minnkaðs kaupmáttar almennt.  Þjónusta flugfélaga gæti rýrnað og flugleiðir til ákveðinna staða jafnvel lagst af.

                                  

Forsætisráðherrann taldi vænlegast til árangurs síðustu mánuðina fyrir efnahagshrunið að aðhafast sem minnst, halda sig til hlés.  Þegar hrunið blasti við hélt hann því fram í fjölmiðlum  að Íslendingar þyrftu að taka á sig, eins og aðrar þjóðir heimsins, skell hinnar “alþjóðlegu fjármálakreppu”.  Svo einfalt væri það. Hann hafði ekki mánuðina á undan gert sér grein fyrir alvarleika ástandsins hér á landi, enda þótt bjöllum hefði verið hringt út um víðan völl og aðvörunarljós í mælaborðinu hefðu löngu verið farin að blikka.  Hann hefur þverskallast við að víkja óhæfum embættismanni úr sínum stól, bankastjóra Seðlabankans (hinir tveir bankastjórar SÍ hafa sig lítt í frammi, að líkindum vegna þess að formaður bankastjórnar, Davíð Oddsson, er einráður þar eins og hann var í raun meðan hann var í ríkisstjórn og formaður Sjálfstæðisflokksins). 

 

Flokkur þinn, Sjálfstæðisflokkurinn, er að verða að örfoka örflokki með sama áframhaldi og nýtur ekki trausts nema hluta af fyrri flokksfélögum. 

 

Og hvað á ég að gera?  spyrð þú.  Ekki nema von því þér er mikill vandi á höndum, meiri en nokkurs foringja í stjórnmálum sennilega undanfarna áratugi. 

 

1.      Þú verður að hlusta á fólkið í landinu.  Það kaus þinn flokk og samstarfsflokkinn.  Þið eruð fulltrúar fólksins í landinu og á launum hjá því.  Ríkisstjórnin með þig í fararbroddi hefur ekki umboð til þess að hygla fámennum fégráðugum klíkum í landinu eða láta sérhagsmuni einstakra góðvina ráða ferðinni.    

2.      Þú verður að sjá til þess að sátt náist í landinu.  Hún næst ekki nema þú víkir frá störfum mönnum innan opinberra stofnana sem njóta ekki trausts og þar ber hæst bankastjóra og stjórn Seðlabankans.   

3.      Þú verður að sjá til þess rannsókn á bönkunum fyrir fall þeirra sé flýtt með öllum tiltækum ráðum. Almenningur krefst tafarlausrar rannsóknar sem þolir enga bið, það verður aldrei sátt fyrr en þetta hefur verið framkvæmt. Í framhaldinu verður þú að sjá til þess sem allra fyrst, að hafi ólöglegir gjörningar verið framkvæmdir  af stjórnendum bankanna og/eða “fjárfestanna” í útrásarliðinu,  verði réttað yfir þeim öllum.  Þeir njóta engra forréttinda umfram aðra þegna og verða að svara til saka 

4.      Þú verður að reyna eftir mætti að koma eftirlaunafrumvarpinu í gegn hið bráðasta. 

5.      Flestum þykir ljóst að gjaldmiðill okkar, krónan, er ekki lengur gjaldgengur og þolir ekki þær efnahagssveiflur sem hafa gengið yfir þjóðina.  Þú verður að flýta umræðum um aðild að Evrópusambandinu hvort svo sem sú aðild gengur eftir eða ekki, umræðan verður að fara í gang.

6.      Þingkosningar eru dýrar.  Það er þó dýrara að hafa í brúnni vanhæfa stjórnendur á þjóðarskútunni bæði til skamms og langs tíma.  Hafi þessi ofangreindu atriði ekki náð framgöngu á næstu vikum er þér sæmst að boða til þingkosninga. 

Höfum við bara séð toppinn á ísjakanum?

 

Burt með spillingarliðið, hvar í flokki sem við erum.                                   

Við verðum að standa saman og láta heyra í okkur, undirstöður samfélagsins eru að morkna og maðkarnir skríða um þær allar.  Ekkert okkar má skorast undan. Þessi rauðletraða fyrirsögn er sending Ólínu Þorvarðardóttur, sem hún mælist til að við dreifum.  Það er ekki nóg að tala í kaffistofunni eða í símann.  Skoðanir okkar verða að sjást og heyrast. Okkur ber siðferðileg skylda að uppræta spillinguna, hún  heldur annars bara áfram.          

Höfum við bara séð toppinn á ísjakanum?