Blikkandi viðvörunarljós

 

Ég hef ekki skrifað blogfærslu í nokkra daga.  Ég hafði ætlað mér að gera stutt hlé á máli mínu.  En nú fæ ég ekki orða bundist.                                                                     

 

Undanfarna daga hafa umræður í þjóðfélaginu snúist um hver sagði hvað við hvern og þá hvenær og ef hann sagði ekki eitthvað af hverju sagði hann það við þennan en ekki hinn.                                                                                                                              

Í stuttu máli virðast ráðherrar ríkisstjórnarinnar koma af fjöllum þegar málið snýr að upplýsingaflæði á milli þeirra og þeir virðast allir sem einn hafa látið formann bankastjórnar Seðlabankans hafa sig að fíflum.  Þeir hafa samt enga tilburði sýnt til þess að biðjast afsökunar á sofandahætti sínum né heldur að hreinsa til í Seðlabankanum. 

 

Málið snýst öðrum þræði um það hvort einhverjar upplýsingar hafi legið fyrir, t.d snemma í vor,  hvort bankarnir þrír mundu hafa burði til þess að lifa af fjármálakreppuna. 

 

Þegar grannt er skoðað lá þetta hins vegar allt á borðinu og þarf ekki dylgjur né oflæti seðlabankastjórans til þess að staðfesta það.  Viðvörunarljósin höfðu margoft logað í stjórnborðinu. 

 

Þessari fullyrðingu til staðfestingar er frétt á vefsíðu RÚV frá 3. mai 2008, þar sem segir:

“Ragnar Árnason prófessor í hagfræði við Háskóla Íslands segir að kreppan í íslenska hagkerfinu standi í það minnsta fram á næsta ár, hugsanlega lengur. Hann leggur til að gjaldeyrisstaðan verði styrkt með erlendu láni upp á 5-600 milljarða króna. Þetta kom fram í erindi sem Ragnar hélt á miðstjórnarfundi Framsóknarflokksins í dag þar sem hann ræddi íslenskt efnahagslíf. Hann byrjaði á að skilgreina stöðuna sem íslenskt hagkerfi væri í núna. Það hefði verið í kreppu sem hófst seint á síðasta ári og stendur fram ánæsta ár. Hún gæti jafnvel staðið lengur ef hún verður tekin röngum tökum.Kreppan verði fremur djúp miðað við fyrri kreppur á Íslandi að sögn Ragnar. Hversu djúp ráðist af viðbrögðum ríkisstjórnarinnar. Og Ragnar hefur áhyggjur af stöðunni núna. Hann segir að í augnablikinu steðji meiri vá að íslensku efnahagslífi en áður í lýðveldissögunni því nú sé íslensku fjármálakerfi verulega ógnað í fyrsta skiptið. Ástæðan er sú að erlendir aðilar treysta ekki bönkunum til að borga skuldir sínar. Bakábyrgð Seðlabankans og ríkisins sé ekki til staðar þar sem bankarnir séu of stórir fyrir íslenska hagkerfið.Ragnar telur að hægja muni á hjólum atvinnulífsins, þjóðarframleiðslan verði minni á þessu ári en í fyrra og að atvinnuleysi verði allt að 5%. Þetta eru svartsýnni spár en komið hafa frá fjármálaráðuneytinu og Seðlabankanum. Ríkissjóður verði svo rekinn með 50-100 milljarða króna. Ragnar leggur til að tekið verði hátt erlent lán til að styrkja gjaldeyrisforðann, að minnsta kosti fimm til sex hundruð milljarðar króna. Með því móti hætti erlendir aðilar að vantreysta bönkunum. Hann bætti því við að vaxtakostnaður lánsins yrði fimm til tíu milljarðar króna. Það myndu bankarnir glaðir borga sjálfir, enda séu þeir nú að bera meiri kostnað af lægri lánum.”

Hér er fréttin öll, smellið á hér að neðan: 

 

URL=http://www.ruv.is/heim/frettir/frett/store64/item204189/                                                                                                                                                                      Hér  Hér voru sem sé viðvörunarljós farin að blikka í mælaborðinu, og ekki þau einu,  en flugstjórinn var annaðhvort sofandi eða virti aðvörunina að vettugi.  Vítavert mundi einhver segja. Og nú fyrst á að fara að skoða hvað er í “svarta kassanum” úr brakinu.       

Athugasemdir

[Sveinn Ingi Lýðsson, 7.12.2008 kl. 18:38]

Nokkrum dögum síðar sendi Seðlabankinn frá sér maí-skýrsluna frægu en þar var allt talið í lagi.

Hver hagfræðingurinn eftir annan varaði við þessu og þeir sem hafa lesið greinar Þorvaldar Gylfasonar vita hvað hann varaði aftur og aftur allt frá því í maí 2005.  

Skipstjóri þjóðarskútunnar silgdi hins vegar beint upp á sker þrátt fyrir að öll siglingatæki blikkuðu rauðu og í stefni stóðu menn sem vöruðu við skerinu framundan.

"Skipið er nýtt en skerið er hró / og skal því undan láta" kvað Staðarhóls-Páll forðum daga og sennilega hefur glys og flottræfisháttur "inn"rásarvíkinga sett glýju í augu skipstjórnans og stýrimannsins á þjóðarskútunni MS-Krísland IS-7913.

[María Kristjánsdóttir, 7.12.2008 kl. 18:52]

Já. Enn ein staðfestingin á ósannindum ráðamanna. Nú er bara að safna krafti yfir jólin!

[Hólmdís Hjartardóttir, 7.12.2008 kl. 18:57]

Við þurfum nýtt fólk til að sigla okkur út úr þessum hremmingum

[Kjartan Eggertsson, 7.12.2008 kl. 19:10]

Ráðherrar þessarar ríkisstjórnar vilja ekki hlusta.  Þeir taka ekki mark á röksemdafærlum.  Þeir taka bara mark á þeim sem geta stuggað við persónulegum skammtímahagsmunum þeirra sjálfra.

Alþingi og ríkisstjórn er að mestu gjaldþrota.  Sjálfstæðisflokkurinn er samansafn nokkurra hagsmunahópa, sem þó eru að liðast í sundur.  Samfylkingin kemur engu í verk sem máli skiptir og er langt frá stefnumálum sínum með þátttöku í þessari ríkisstjórn, -enda virðist helsta áhugamálið vera að fá að verma ráðherrastólana.  Þrátt fyrir einstaka spretti í rökræðunni þá eru Vinstri-grænir svo arfa ruglaðir að formaðurinn, Steingrímur J. vill skoðanakönnun um inngöngu í ESB áður en hann og VG tekur endanlega til málsins.  Framsóknarþingmennirnir vilja eitt í dag og annað á morgun.  Og þrátt fyrir að Frjálslyndir hafi sterkar skoðanir um rót vandans þá er eins og enginn vilji kannast við að sá flokkur sé til, enda í þöggunarferli af hálfu fjölmiðla.

Það gerist ekkert nýtt í framtíðinni ef við fáum ekki nýtt fólk inn í pólitíkina.

[Hallgrímur Guðmundsson, 7.12.2008 kl. 19:14]

Eins og Sveinn Ingi segir þá var búið að margvara við þessu en menn tóku frekar þá ákvörðun að hrópa Húrra, Húrra, Húrra fyrir útrásinni sem átti að vera algjörlega ósnertanlegt viðskiptaundur, en reyndist í raun útpælt rán á sparifé almennings bæði hér heima og erlendis.

Allt stjórnarpakkið ber ábyrgð, það þarf einnig að hreinsa út úr ráðaneytunum þar sitja margir úlfar sem þarf að losna við.

[Bjarni Harðarson, 7.12.2008 kl. 19:29]

sæll - viðtalið við ragnar var tekið eftir að hann flutti erindi samhljóða þessu á vorfundi miðstjórnar framsóknarflokksins. hér er ekkert ofsagt og við vorum fjölmargir sem vöruðum við þessu allan síðasta vetur - en það var tæpast að fjölmiðlar hefðu áhuga á því þá, hvað þá stjórnarliðar í ríkisstjórninni sem voru enn að karpa um það við mig og fleiri í september hvort það væri ekki einum of að kalla tímabundna erfiðleika kreppu...

[Ásdís Sigurðardóttir, 7.12.2008 kl. 19:46]

Þetta er alveg magnað, takk fyrir að birta þetta okkur til fróðleiks, greinilegt hverjir ljúga mest hér á landi.  Kveðja

[Marinó G. Njálsson, 7.12.2008 kl. 19:59]

Vandamálið var, Guðjón, að það voru ekki "réttir" aðilar sem komu með viðvaranirnar.

[Sigrún Jónsdóttir, 7.12.2008 kl. 21:37]

Voru þeir (seðlabanki og ríkisstjórn) ekki að bíða eftir hagstæðu láni?????......en gripu svo í tómt

[Heidi Strand, 7.12.2008 kl. 23:17]

Sigrún, Jó við biðum og biðum og þegar Sindri spyrði Geir um hvar peningarnir voru var hann svarað með hann væri dónalegur. Það hafði verið gaman að sjá aftur þessa frétt frá Stöð 2

[Árni Gunnarsson, 7.12.2008 kl. 23:30]

Og þessir lafhræddu og síljúgandi pólitíkusar sem kannast hvorki við sín eigin orð né annara telja sig þess umkomna að tala niður til okkar alla daga.

Og þeir sitja sem fastast því engum öðrum er treystandi!

[Haraldur Haraldsson, 7.12.2008 kl. 23:45]

Þetta er sannleikurinn blákaldur/af hverju var þetta samþykkt á Alþingi að taka þetta lán og ekki gert/þetta eru bara Landráðasvik og ekkert annað,engin afsökun gild þarna /Halli gamli

[Lúðvík Júlíusson, 8.12.2008 kl. 01:38]

Í Peningamálum Seðlabankans, sumarið 2006, er birt skýrsla IMF um ástand efnahagsmála á Íslandi.  Þar segir hann m.a. að ástandið hér sé að fara úr böndunum, skuldsetning banka allt of mikil, verðbólga of mikil og ríkissjóður ekki rekinn með nægum afgangi.  IMF sagði að ríkið þyrfti að grípa til róttækra aðgerða til að koma skikk á óreiðuna... ekkert gerðist.  IMF gagnrýndi einnig að ríkisstjórnin hefði ekki gripið til neinna aðgerða fyrr(á árunum fyrir 2006).

Les enginn Peningamál?

Þetta er næg ástæða fyrir því að hlusta ekki á Framsóknarmenn þegar þeir segjast hafa varað við.  Þeir hlusta jafn mikið og Davíð og gera jafn lítið, helst ekki neitt.

[Sverrir Einarsson, 8.12.2008 kl. 04:32]

Heimildir sveimildir. það er ekki nóg að fá heimildir til að gera hitt og þetta ef þessar heimildir eru ekki  notaðar. Ef ríkisstjórnin telur það að "gera eitthvað" sé að afla sér heimilda er hún á villigötum. Það þarf að nota heimildirnar ekki bara fá þær og þora svo ekki að nota þær. Flokkast það ekki á mannamáli að gera ekki rassgat?

[Kári Harðarson, 8.12.2008 kl. 08:15]

Allir gátu séð aðvörunarljósin blikka en þetta voru bara orð á móti orðum, enginn gat fullyrt að hann hefði rétt fyrir sér.

Það er brottrekstrarsök fyrir Geir og Davíð hvernig þeir hafa haldið á málum. 

Ég velti fyrir mér öðru: hversu stór hópur venjulegs fólks hefur sitt á þurru núna vegna aðvarananna góðra manna sem vöruðu við kreppu?

Fram á síðasta dag gátu venjulegir borgarar lýst yfir vantrausti á stefnu Seðlabankans með því að selja eignir eða krónur og kaupa Evrur fyrir.

Hvað segið þið hin?  Undirbjugguð þið ykkur fyrir kreppu?

[Gullvagninn (IP-tala skráð) 8.12.2008 kl. 09:19]

Peningakerfið er allt fals, pýramídasvindl, það er hægt að láta það virka (það byggir á trausti, eingöngu, eftir að gullfótur var höggvin af) eða það er hægt að láta það hrynja.  Hvernig á maður að búa sig undir sláturtíðina, ef þú ert ekki innvígður og innmúraður?

Ríkisstjórn og þingið bera ábyrgð, þetta er hönnuð atburðarás, og þeir seku er enn að vefja okkur í verri mál og stærri skuldir. 

Grundvallarspurningin er: Hverjir eru ábyrgir fyrir því að selja banka fyrir 12 milljarða (smáfé) en horfa svo framhjá þegar þessir sömu bankar taka lán með okkar ábyrgð upp á þúsundir milljarða?

[Lúðvík Júlíusson, 8.12.2008 kl. 09:38]

Kári: Allar bólur springa að lokum en það er ógerlegt að tímasetja þær nákvæmlega.  Það er líka erfitt að meta hversu stórar bólurnar eru ef maður er bara launamaður.

Ég varaði við þessu frá 2005 og átti ekkert á Íslandi nema skuldir en eignirnar mínar voru allar erlendis. Skuldirnar mínar hafa minnkað hlutfallslega og ég er mjög ánægður með það.

Viðvörunarljós fyrir venjulegt fólk var þegar dollarinn var í 58 kr og Evra í 73 kr.  Það ástand er jafn eðlilegt og ástandið sem við upplifum nú.