Ekkert vit, engin hemja

Í hausthefti Skírnis, tímariti hins íslenska bókmenntafélags, er snörp ádeila á stjórnvöld og útrásarvíkinga og aðra þá sem ábyrgir eru fyrir efnahagshruninu á Íslandi eftir Þorvald Gylfason, prófessor í hagfræði.  Greinin nefnist: "Ætlar linkindin aldrei að líða hjá" og leyfi ég mér hér með birta niðurlag hennar:

VII. Ekkert vit, engin hemja

Það hefði átt að blasa við hverjum heilvita manni, að umsvif útrásarvíkinganna og vina þeirra í bönkunum og stjórnmálaheiminum náðu engri átt. Enginn atvinnurekstur stendur undir svo augljósri vitleysu. Tökum kvótakónginn, sem keypti sér þyrlu, af því að honum hentaði ekki stundatafla áætlunarflugsins milli lands og eyja. Tökum bankaeigandann, sem byggði sér hús í Reykjavík með skotheldum rúðum í gluggum og fullbúinni skurðstofu inni í íbúðinni. Tökum allt fólkið, sem keypti sér rándýr hús til þess eins að sprengja þau í loft upp og byggja enn dýrari hús á lóðunum. Tökum bankastjórana og starfsmenn þeirra, sem tóku sér laun, sem stóðu bersýnilega í engu samhengi við vinnuframlag þeirra, eins og kom á daginn. Tökum nýbyggingarnar í þjóðgarðinum á Þingvöllum, sem á þó að heita friðlýst land. Ekkert af þessu náði nokkurri átt, og mætti þó hafa listann miklu lengri. Taumlaus græðgin í bönkunum tók út yfir allan þjófabálk. Eigendur bankanna röðuðu stjórnmálamönnum í kringum sig öðrum þræði að því er virðist til að kaupa sér frið. Illugi Gunnarsson þingmaður Sjálfstæðisflokksins og fyrrum aðstoðarmaður forsætisráðherra sat til dæmis í stjórn sjóða Glitnis þar til bankinn hrundi. Hvað var hann að gera þar? Eigendur bankanna notuðu þá til að lána sjálfum sér og fyrirtækjum sínum til vafasamra fjárfestinga og fólu stjórnendum og starfsmönnum bankanna að ráðleggja viðskiptavinum að flytja sparifé af tryggðum innlánsreikningum yfir í ótryggða sjóði, sem voru hálffullir af verðlitlum eða verðlausum pappírum eigendanna. Þessi háttsemi bankanna varðar við lög og hefur rænt mikinn fjölda sparifjáreigenda miklu fé. Það ýtir undir gamla tortryggni, að ákæruvaldið skuli ekki hafa látið strax til skarar skríða gegn bönkunum eftir hrunið frekar en að boða mörgum vikum síðar til veiklulegrar athugunar á því, hvort lög kunni kannski að hafa verið brotin. Silagangur ríkisstjórnarinnar síðan bankarnir hrundu vekur ekki heldur traust. Eina færa leiðin til að endurreisa nauðsynlegt traust milli manna inn á við og álit Íslands út á við er að spúla dekkið. Stjórnmálastéttin hefur brugðizt, big time. Hún þarf að draga sig möglunarlaust í hlé, víkja fyrir nýju fólki og veita því frið til að leggja grunninn að endurreisn efnahagslífsins og réttarkerfisins með góðra manna hjálp utan úr heimi.

Ekkert minna dugir.Góðar stundir.

 

Botninn er suður í Borgarfirði

Í þjóðsögum Jóns Árnasonar segir af Bakkabræðrum:

"Á bæ þeim sem á Bakka heitir í Svarfaðardal bjó bóndi einn fyrir löngu. Hann átti þrjá sonu: Gísla, Eirík og Helga; voru þeir orðlagðir fyrir heimsku og heimskupör þeirra mjög í frásögur færð þó fæst þeirra verði hér talin."

"Þá keyptu þeir bræður einu sinni stórkerald suður í Borgarfirði og slógu það sundur svo það væri því hægra í vöfunum að flytja það.

Þegar heim kom var keraldið sett saman og farið að safna í það, en það vildi leka. Fóru þá bræðurnir að skoða hvað til þess kæmi. Segir svo einn þeirra: "Gísli-Eiríkur-Helgi, ekki er kyn þó keraldið leki, botninn er suður í Borgarfirði."

„Það versta er enn eftir," segir Oliver Blanchard í viðtali við þýska blaðið  Finanz und Wirtschaft, „og það mun taka langan tíma þar til ástandið verður eðlilegt á ný."

Segir þessi talnaspaki maður og hefur væntanlega rétt fyrir sér. Forsætisráðherra Íslands hefur hins vegar margoft sagt í fjölmiðlum að botninum sé "væntanlega" náð.  Ekki alveg trúverðugt.  Sennilega mikill frostavetur framundan næstu árin.   

Botni kreppunnar ekki náð

Myndskeið frá Austurvelli í gær

Ræða Katrínar Oddsdóttur, laganema, á mótmælafundinum á Austurvelli í gær hefur óneitanlega vakið mikla athygli. Það mikla að dómsmálaráðherra, Björn Bjarnason, sér ástæðu til að fjalla sérstaklega um hana á blogsíðu sinni.  Hann er ekki sérlega uppveðraður - enda ekki von.                       

Þar sem margir hafa ekki haft tækifæri til þess að sjá og hlusta set ég hér "vísi" á myndskeiðið:

http://www.visir.is/article/20081122/FRETTIR01/964086305

Fallin með 3,2

Ríkisstjórnin hefur ekki umboð þjóðarinnar skv. þessari skoðanakönnun.  Sjálfstæðismenn eru samkvæmt venju flokkshollir og virðist þurfa miklu meira en þjóðargjaldþrot til þess að hinn sanni sjálfstæðismaður víki frá venju sinni að styðja við bakið á sínu fólki. 

Stuðningur við Samfylkinguna er í takt við það sem heyra má í þjóðfélaginu, óánægjuraddir og krafa um að gengið verði til kosninga til þess að kanna hversu sterkt bakland flokkurinn hefur almennt í þjóðfélaginu.

Ef ríkisstjórnin hefur ekki sómatilfinningu til þess að taka þessar tölur alvarlega hefur hún glatað enn meira af trausti sínu.  Það er viðbúið að svör ráðamanna verði á þennan veg:  "Þetta er nú bara lítil skoðanakönnun og ber að túlka hana sem slíka".  Ríkisstjórnin hefur lifað síðustu vikurnar í slíkri afneitun og sjálfsblekkingu. 

Ríkisstjórnin mundi ekki tapa trúverðugleika við að mynda utanþingsstjórn hið bráðasta, boða til kosninga sem gætu þess vegna farið fram í vor og kallað eftir umboði kjósenda.  Ef einhvern tíma var nauðsynlegt að fá vinnufrið og finna að þjóðin getur orðið sátt við eitthvað af því ríkisstjórninn er að gera, þá er það núna. Það mundi væntanlega flýta aðgerðum ríkisstjórnarinnar og alls ekki spilla vinnufriði hennar nú þótt gengið yrði til kosninga í vor. 

Það er ekki rétt hjá Ingibjörgu Sólrúnu að með kosningum sé verið að skipta um áhöfn í miðri björgunaraðgerð. Í fyrsta lagi er björgunaraðgerðin máttleysisleg og lítið annað en langtíma ofurskuldsetning íslensku þjóðarinnar.  Í öðru lagi eru aðgerðir hennar til hjálpar íslenskum heimilum smánarleg og í rauninni ekkert annað en plástur á meðvitundarlítinn þjóðarlíkama sem er að blæða út.  Það þarf bráðaaðgerð og það stóra og strax. 

31,6% stuðningur við stjórnina

Syndir feðranna

Enn hækkar í skuldasúpupottinum.  Það ber kannski að hafa í huga að það þarf að borga lánin, og væntanlega með vöxtum.  Er það leyfilegt samkvæmt Mannréttindarsáttmála að skuldsetja komandi kynslóðir upp í topp?  Er það ekki mannréttindabrot að láta börnin okkar og barnabörnin okkar greiða fyrir rán 30 einstaklinga?  Og sofandahátt stjórnvalda sem nú ætla að taka við þessum peningum?.  Ég bara spyr? Hefur ríkisstjórnin kynnt sér hinn lagalega grundvöll fyrir skuldsetningu þeirra sem eiga að erfa landið?  Hvar er réttlætið? 

Þjóðverjar lána Íslandi

Ajax - þrýfur allt

Orð á móti orði. Hvað sem segja má um þessar lánveitingar þá hefur Jón Ásgeir Jóhannesson glatað öllum trúverðugleika.  Hann getur sent frá sér tugi fréttatilkynninga og útskýringa en það nægir ekki til þess að auka tiltrú á honum né færa honum aftur æruna.  Því miður, of seint, lestin er farin. 

Jón Ásgeir: Ekkert óeðlilegt við afgreiðslu lánanna

Að fara úr límingunum

Mótmælin á Austuvelli í dag fóru að því mér virtist friðsamlega fram og var mælst til þess að slíkur háttur yrði hafður á áfram.  Þannig ná þau tilgangi sínum.  Múgæsing vegna tilviks sem þessa virðist mér fremur endurspegla þann mikla óróa sem er í þjóðfélaginu og manni stendur óneitanlega nokkur ógn af. 

Spennan í fólki magnast dag frá degi, það má ekkert gerast, fólk fer úr límingunum út af öllu, kveikiþráðurinn styttist og styttist. Í ljósi þess eru þessi mótmæli við lögreglustöðina skiljanleg enda þótt séu ekki til eftirbreytni né málstaðnum til framdráttar. 

Ef stjórnvöld fara ekki að gera eitthvað róttækt í málunum, annað en líma plástur á svöðusár er hætt við að hér fari að ríkja vargöld, ef ekki bara borgarastyrjöld.  Það er því eins gott fyrir landstjórnina að taka hlutunum alvarlega, váleg tíðindi eru fyrir dyrum ef ekki er aðhafst eitthvað róttækt og það STRAX.

 

Mótmæli við lögreglustöðina

Við látum ekki kúga okkur - myndskeið

Erum við að ná árangri?  Ég held það.  Til þess að koma skilaboðum áleiðis til sem flestra þurfum við að nota þau tæki sem tiltæk eru. Margmiðlunarleiðin er ein þeirra auk mótmælafunda og skrifta.  Hér er slóðin inn á myndskeiðið af mótmælafundinum á Austurvelli í dag.  Væntanlega kann einhver snjall tölvumaður að koma myndinni inn á Youtube.com vefinn. 

http://www.visir.is/article/20081122/FRETTIR01/964086305

RÁÐAMENN: HORFA OG HLUSTA!

Þessa frábæru ræðu Katrínar ætti að festa á disk, senda til ráðamanna, Seðlabankans og þingmanna og beina þeim tilmælum til þeirra að þeir horfi og hlusti, hafi þeir ekki gert það þegar. Þeim tíma væri vel varið.                                                                         

Katrín talaði fyrir hönd íslensku þjóðarinnar, það er ekki hægt að koma skilaboðunum betur frá sér.  Eigi hún þökk og heiður skilið fyrir.

Íslendingar láti ekki kúga sig

SAMFARAFLOKKURINN - nýtt stjórnmálaafl til framsóknar

 

Nýtt stjórnmálaafl er í burðarliðnum. Undirbúningur er þegar hafinn og bjartsýni mikil á að flokkurinn fái sterkan vind í seglin ekki síst í ljósi þess að kosningar kunna að verða haldnar á næsta ári og fólkið í landinu hefur kallað eftir nýju afli.              

 

Stjórnarsamstarfið er líka í uppnámi og allt er mögulegt og nú er því lag. Þegar skoðaðar eru stefnuskrár flokkanna á Alþingi þykir undirbúningsnefndinni ljóst að einhvers konar bræðingur af því besta úr Samfylkingunni og Sjálfstæðisflokknum sé ákjósanlegastur og vænlegastur til þess að leiða til ávinnings í kosningum.    

 

Fundið hefur verið nafn á flokkinn.  Byrjað var á  bræðingi úr þeim flokkum sem FARA með stjórn landsins  í dag:   SAMfylkingin og SjálfstæðisFLOKKURINN.  Þarna FARA  saman stærstu stjórnmálaöflin og hugmyndin var því að safna því besta úr málefnaskrá þessara flokka en henda hinu fyrir róða. 

 Hugmyndir hafa vaknað um slagorð SAMFARAFLOKKSINS og eru hér nokkur slík:  

1.  Stöndum saman

2.  Það mun ekki standa á okkur

3.  Standið með Samfaraflokknum

4.  Samfaraflokkurinn kemur sterkur inn

5.  Við erum opin fyrir samræðum

6.  Við viljum innlimun sem flestra í Samfaraflokkinn

7.  Nýtum okkur samlegðaráhrif

8.  Samfaraflokkurinn mun ekki liggja á liði sínu

9.  Við viljum nýjar og breyttar aðferðir

10.Við viljum reisn og rétt hugarfar

 

Til þess að fyrirbyggja allan misskilning hefur nafn flokksins ekkert með kynferðismál að gera enda þótt svo kunni að virðast í fyrstu.  Samfaraflokkurinn er ný hreyfing sem hefur aðeins eitt markmið:  Að standa sig. 

Áfallastjórnuninni lokið