Er búið að vaska upp?

 

Margar sögur voru sagðar af Lása kokk í gamla daga.  Ein var á þann veg að skipið sem hann var kokkur á var að sökkva.  Þá átti Lási að hafa sagt: "Almáttugur og ég sem er ekki búinn að vaska upp".  Veruleikatengingin hjá þeim félögum Geir og Davíð er nú lítið betri.  Er ekki betra að velta því fyrir sér hvort fólkið á skipinu komist í björgunarbáta?

Hugmynd forsætisráðherra

En orðstír deyr aldregi

 

Að öðrum ólöstuðum er að mínu viti enginn núlifandi Íslendingur sem hefur lagt jafn mikla rækt við að bæta ímynd íslensku þjóðarinnar, tungunnar og landsins okkar á alþjóðlegum vettvangi eins og frú Vigdís. Og er enn að.  Ég vakti í nýlegri færslu á blogsíðunni minni athygli á þætti Jóns Ársæls, Sjálfstæðu fólki, um daginn með frú Vigdísi, góður þáttur þar hún samhliða því að lýsa miklum vonbrigðum yfir því komið er fyrir íslensku þjóðinni, stappar stálinu í landsmenn og leggur áherslu á það sem við eigum þrátt fyrir allt og er okkur mikilvægast. 

Deyr fé,

deyja frændur,

deyr sjálfur ið sama.

En orðstír

deyr aldregi

hveim er sér góðan getur.

                        (úr Hávamálum)

Íslendingar verða að endurheimta virðinguna

Strandið IS-874

Skipið IS-874 hefur strandað.  Það er búið að kalla í björgunarsveitirnar og Landhelgisgæsluna. Þær eru á leiðinni. Þær hafa hins vegar gefið fyrirmæli til skipsstjórnarmanna um hvernig að björgun skuli staðið.  Skipsstjórnarmenn eru að væflast um á dekkinu og eru mikið að velta því fyrir sér hvað hafi komið fyrir.  Sofnaði stýrimaðurinn, voru þið ekki með rétt kort?  Var skipstjórinn fullur? Og nú hefst mikil rekistefna.  Það fer allur tíminn og orka í að karpa um hver hafi gert hvað og hver hafi ekki gert hvað.  Á meðan versnar ástandið á strandstað.  Við erum heimsmeistarar í þessari grein (We are The Champions).   

Strandaði á sandrifi

Bankastjóralaun

 

Hér á árum áður, löngu fyrir ris og hrun bankanna,  var talað um bankastjóralaun og skúringakonulaun.  Þetta var haft sem viðmið hátekju- og láglaunstétta.  Öllum er ljóst að laun bankastjóra bankanna þriggja voru komin mörg ljósár fram úr venjulegri launaþróun og út yfir alla skynsemi. 

Því má ekki gleyma í þessu samhengi að laun bankastjóra Seðlabankans voru hækkuð á síðustu misserum til þess að ekki gætti misræmis milli launa þeirra og bankastjóra hinna bankanna.  Laun bankastjóra Seðlabankans eru óbreytt.                                                                 

Formaður bankastjórnar, Davíð Oddsson, er hæst launaði embættismaður íslenska ríkisins.  Það þarf að taka til, alveg hárétt. 

Laun embættismannanna lækkuð?

Stríðsmaskínurnar Bush og Davíð

Á næstunni hverfur af valdastóli óvinsælasti forseti Bandaríkjanna fyrr og síðar.  Hann hefur ekki bara skapað sér óvinsældir heimafyrir heldur alls staðar í heiminum.  Og verður hans ekki saknað.  Þeir Davíð Oddsson, sá sem fór mikinn á fundi í gærmorgun og barði frá sér á hægri og vinstri með sveðjum hefur ekki talist maður friðarins.  Hann kom okkur Íslendingum á spjöld sögunnar með því að koma þjóð okkar í stríðsbandalag með Bandaríkjamönnum og "vinum okkar" Bretum.  Þetta man íslensk þjóð og má aldrei gleymast.  Íslendingar höfðu aldrei verið þátttakendur í styrjöldum.  Að vísu verið í hernaðarbandalagi, NATO með þessum þjóðum en aldrei yfirlýst stuðningsþjóð í stríðsaðför gegn annarri þjóð.  Þeir voru miklir vildarvinir Bush og Davíð og eru sjálfsagt enn.  Þetta myndband er að hluta til tekið upp þegar Davíð heimsótti Bush í Hvíta húsið 2004 og það talar sínu máli.

Slagsmál á skólalóðinni

 

Það var nú þannig á skólalóðinni í barnaskóla að þegar kennarinn spurði hver ætti upptökin að öllum þessum slagsmálum og látum bentu allir á alla þannig að við vorum stundum allur bekkurinn látinn sitja eftir.  Stundum var bakari hengdur fyrir smið.  Er þetta ekki nákvæmlega eins hjá þessum háu herrum sem hafa nú víst lokið barnaskólanámi. 

Ábyrgðin liggur hjá bönkunum

Æfing í kvöld í Lögreglukórnum

 

Kæru félagar,

Það er æfing í kvöld í Lögreglukórnum.  Við fáum til okkar gestasöngvara úr Seðlabankanum, alþingi, fjármáleftirlitinu og frá stjórnarheimilinu.  Útrásarfélagið sér um kaffiveitingar.  Ef eitthvað kemur upp á meðan á æfingu stendur vinsamlega bendið ekki á mig.

Varðstjóri

Davíð á ábyrgð forystu ríkisstjórnar

Að tala niður til annarra

 

Þessi tegund ræðumennsku kallast víst að tala niður til annarra en það hefur einkennt ræðumennsku þessa fyrrum einræðisherra síðustu áratugina.  Það hefur ekkert breyst.  Allir aðrir eru annaðhvort asnar eða fávísir óráðsíumenn.  Hann vissi þetta allt saman fyrir en enginn annar.  Það hlustaði bara enginn á hann.  Af hverju?  Af því að það trúir honum enginn og allir vita að takmark hans nr. 1, 2 og 3 er að upphefja sjálfan sig og koma Baugsveldinu á knén, þótt það kosti þjóðargjaldþrot. 

Fjölmiðlar í heljargreipum

Eru engin takmörk

 

Er þessum manni ekki ennþá ljóst hvað hann hefur valdið miklum skaða fyrir íslenskt samfélag?  Og að  íslenska þjóðin vill hann burt?  Að fólk vill ekki hlusta á hann?  Að það trúir honum enginn?  Viðskiptaráð Íslands setur verulega niður fyrir að fá slíkan mann á fund.  Nú er höfuðið bitið af skömminni.

Uppskeran eins og sáð var

Lífið er kabarett

 

Í því skiptast á skin og skúrir, mótbyr og meðbyr.  Nú blæs heldur á móti og skipið í ólgusjó.  Áhöfnin er að snæðingi við háborðið en við, hinir almennu farþegar, erum að velta fyrir okkur hvort skipið fer undir og þá hvort við komumst í björgunarbátana.                                                                     

Eru ekki  nokkrir úr fjárglæpaklíkunni (útrásarvíkingar) við háborðið á fundinum á NASA?  Fulltrúar frá Seðlabankanum og FME?                                                                                      

Lífið snýst víst ekki um peninga en mikið helv. geta þeir haft mikil áhrif.                           

Það hefði nú verið skemmtilegra að vera að horfa á kabarett á NASA, en svona er lífið.    

Troðfullt á fundi á Nasa